Zvicra ka njoftuar ndarjen e 4 milionë frangave shtesë për Agjencinë e Kombeve të Bashkuara për Refugjatët (UNHCR), me qëllim mbështetjen e evakuimit dhe kujdesit për civilët e prekur nga lufta në Ukrainë, përcjell albinfo.ch.
Vendimi është bërë i ditur më 9 nëntor në Kiev nga Jacques Gerber, i deleguari i Këshillit Federal për Ukrainën, gjatë një takimi me përfaqësuesen e UNHCR-së në këtë vend, Bernadette Castel-Hollingsworth.
Sipas autoriteteve zvicerane, sulmet e vazhdueshme ruse kanë përkeqësuar kushtet e jetesës në rajonet pranë vijës së frontit, veçanërisht në Kherson dhe Donetsk, ku shumë banorë janë detyruar të largohen nga shtëpitë e tyre.
Ndihma do të përfshijë organizimin e evakuimeve, mbështetje financiare emergjente dhe sigurimin e strehimit. Personave të prekur do t’u ofrohet gjithashtu këshillim juridik dhe psikologjik, si dhe ndihmë për të pasur qasje në shërbimet publike.
Vëmendje e veçantë do t’u kushtohet fëmijëve, të moshuarve, personave me aftësi të kufizuara dhe atyre që kanë nevojë për kujdes të vazhdueshëm shëndetësor ose social.
Kjo mbështetje është pjesë e programit zviceran për Ukrainën për periudhën 2025 deri në 2028, me një buxhet prej 1.5 miliardë frangash. Në kuadër të angazhimit afatgjatë, Zvicra ka planifikuar gjithsej 5 miliardë franga ndihmë për Ukrainën deri në vitin 2036. /Albinfo.ch
