Kryeministri i Kosovës, Albin Kurti, ka takuar pjesëtarë të mërgatës shqiptare në Francë, me të cilët ka diskutuar për përfshirjen e tyre në jetën publike dhe institucionale të Kosovës, si dhe për mundësitë e investimeve në vend, përcjell albinfo.ch.
Takimi është zhvilluar të dielën, në prag të pjesëmarrjes së Kurtit në Forumin e Paqes në Paris. Përmes një postimi në Facebook, kryeministri ka vlerësuar rolin e diasporës në zhvillimin ekonomik dhe forcimin e institucioneve të Kosovës.
Ai ka theksuar se përvoja profesionale, ekspertiza dhe kultura e punës që bashkatdhetarët sjellin nga vendet ku jetojnë përbëjnë një kontribut të rëndësishëm për Kosovën.
Kurti ka bërë të ditur se përmes mekanizmit “Dritarja për Investime të Diasporës” do të mbështeten ndërmarrësit nga mërgata që dëshirojnë të realizojnë investime në Kosovë.
Sipas tij, shteti do të shërbejë si garant për kreditë që merren për këto investime, me qëllim lehtësimin e qasjes në financim dhe nxitjen e zhvillimit ekonomik.
Kryeministri ka përmendur gjithashtu Programin 1 Miliard Euro për prodhim dhe industri, përmes të cilit synohet mbështetja e projekteve strategjike dhe prioritare në sektorin industrial.
Ai ka theksuar se këto mekanizma synojnë t’i krijojnë diasporës mundësi që, krahas kontributit të vazhdueshëm për vendlindjen, të përfshihet më shumë në investime që sjellin përfitime ekonomike. /Albinfo.ch
