Një version tjetër i ngjarjes është konstatuar në gjykimin për vrasjen e një gruaje 38-vjeçare nga Kosova, nënë e katër fëmijëve, në Austri. Një 45-vjeçar (nga Kosova), i akuzuar se kishte siguruar armën e përdorur për vrasje, është liruar nga paraburgimi të enjten, më 12 nëntor 2026, pas paraqitjes së tij para Gjykatës Rajonale në Wiener Neustadt.
Megjithatë, akuza ndaj tij mbetet në fuqi dhe procesi gjyqësor po vazhdon.
45 vjeçari është liruar pak para orës 16:00 të ditës së enjte, pasi gjatë seancës gjyqësore kishte mohuar përfshirjen në vrasjen e ndodhur më 5 prill 2026, në Sooß(rrethina e Baden) në Austrinë e Poshtme, i cili ishte në paraburgim që nga data 7 prill, shkruan heute.at, përcjell albinfo.at.
Prokuroria pretendon se 45-vjeçari i kishte shitur një pistoletë Beretta dhe tre fishekë për 900 euro një 47-vjeçari, (v.j.po ashtu nga Kosova), duke qenë në dijeni se arma do të përdorej për vrasjen e ish-bashkëshortes së tij më të cilën kishte vite që ishte i ndarë.
Gjatë gjykimit, i akuzuari ka paraqitur një version tjetër të ngjarjes, duke deklaruar se nuk i kishte shitur asnjë armë 47-vjeçarit. “Jam i pafajshëm, dhe nga data 7 prill po mbahem padrejtësisht këtu”, deklaroi ai gjatë marrjes në pyetje.
Sipas tij, ishte pikërisht i akuzuari kryesor që kishte tentuar t’ia shiste pistoletën për 500 euro.
Avokati i 45 vjeçarit, Mirsad Musliu, ka kundërshtuar besueshmërinë e deklaratave të të akuzuarit kryesor, duke theksuar se ekzistojnë kundërthënie lidhur me prejardhjen e armës dhe përpjekjet e mëparshme për sigurimin e municionit.
Mbrojtja ka kërkuar që këto rrethana të merren parasysh gjatë vlerësimit të përgjegjësisë penale të klientit të tij.
47 vjeçari pranon vrasjen e ish-bashkëshortes
Ndërkohë, i akuzuari kryesor, është 47-vjeçari, i cili dyshohet se, më 5 prill kishte qëlluar tri herë me armë zjarri bashkëshorten e ndarë dhe më pas e kishte goditur 40 herë me kaçavidë.
Gjatë gjykimit ai e ka pranuar kryerjen e krimit, por ka pretenduar se kishte vepruar në vetëmbrojtje. Një ekspertizë e re psikiatrike ka ngritur gjithashtu dyshime për përgjegjësinë e tij penale në kohën e ngjarjes.
Gjykimi do të vazhdojë të martën, më 17 nëntor 2026, në Gjykatën Rajonale të Wiener Neustadt.
Ndërsa 45-vjeçari është liruar nga paraburgimi, i akuzuari kryesor vazhdon të mbahet në paraburgim. Prokuroria nuk e ka tërhequr akuzën e 45-vjeçarit për bashkëpunim në vrasje, ndërsa përgjegjësia penale e të dyve mbetet për t’u përcaktuar nga gjykata.
