Kosova dhe Portugalia synojnë organizimin e një Forumi Ekonomik të përbashkët në pranverën e vitit 2027, me qëllim të forcimit të lidhjeve ekonomike, nxitjes së investimeve dhe krijimit të mundësive të reja për bizneset e të dyja vendeve, njofton albinfo.ch.
Kjo u bë e ditur gjatë një aktiviteti të organizuar nga Ambasada e Kosovës në Portugali, në bashkëpunim me Konfederatën e Bizneseve të Komunitetit të Vendeve Portugalishtfolëse, ku mori pjesë ministrja e Industrisë, Ndërmarrësisë, Tregtisë dhe Inovacionit, Mimoza Kusari-Lila.
Në këtë pritje ishin të pranishëm edhe përfaqësues të bizneseve nga Portugalia, Brazili, Kepi i Gjelbër, Guinea-Bisau dhe Angola.
Konfederata, nën drejtimin e dr. Nelma Fernandes, shërben si platformë për ndërlidhjen e bizneseve nga vendet portugalishtfolëse me Kosovën, duke krijuar mundësi për bashkëpunim ekonomik, partneritete dhe shkëmbim tregtar.
Një hap tjetër në këtë drejtim është edhe anëtarësimi i fundit i Odës Ekonomike të Kosovës si anëtare e asociuar në këtë Konfederatë. Ky zhvillim pritet të krijojë një kanal të drejtpërdrejtë për vendosjen e kontakteve të reja dhe zhvillimin e partneriteteve ndërkombëtare.
Gjatë aktivitetit u bë e ditur se në muajt në vijim do të punohet për përgatitjen e Forumit Ekonomik Kosovë–Portugali, i cili synohet të mbahet në pranverën e vitit 2027. Përmes këtij forumi, palët synojnë që kontaktet e krijuara të shndërrohen në bashkëpunime konkrete, investime dhe mundësi të reja për komunitetin e biznesit./Albinfo.ch
