Ministria për Punë, Familje dhe Vlerat e Luftës Çlirimtare ka publikuar përmbledhjen e gjetjeve të inspektimit të jashtëzakonshëm në Qendrën për Punë Sociale në Pejë, lidhur me trajtimin e rastit të së ndjerës A. Z., përcjell albinfo.ch.
Sipas njoftimit të ministrisë, raporti ka konstatuar mosrespektim të afatit gjyqësor, neglizhencë në përmbushjen e detyrave, mosveprim sipas detyrës zyrtare dhe mungesë të mbikëqyrjes profesionale.
Ndër shkeljet e evidentuara është dorëzimi i raportit në gjykatë jashtë afatit shtatëditor të përcaktuar me aktvendimin e 24 shtatorit 2026. Raporti është dorëzuar më 5 tetor, datë në të cilën, sipas ministrisë, menaxherja e rastit ka munguar pa arsyetim në seancën gjyqësore.
Inspektimi ka evidentuar gjithashtu mosrealizimin e monitorimit pas pranimit të aktvendimit gjyqësor të 7 shtatorit, mosplotësimin e formularit për kontaktet dhe punën në rast, si dhe moshartimin e Planit Individual të Shërbimeve.
Raporti ka konstatuar edhe mungesë të mbikëqyrjes profesionale nga udhëheqësi i Shërbimeve Sociale mbi punën dhe përmbushjen e detyrave të menaxheres së rastit.
Për këto gjetje, Divizioni i Inspektimit i ka rekomanduar kryetarit të Komunës së Pejës ndërmarrjen e masave disiplinore ndaj menaxheres së rastit, T. G., dhe udhëheqësit të Shërbimeve Sociale, D. K., sipas përgjegjësive të tyre dhe procedurave ligjore./Albinfo.ch
