Estonia ka njoftuar se do t’i mbyllë plotësisht të gjitha pikat e kalimit kufitar me Rusinë nga 1 dhjetori, pas një tentative për zjarrvënie në një fabrikë të prodhimit të dronëve, për të cilën autoritetet estoneze fajësojnë inteligjencën ushtarake ruse, GRU-në.
“Estonia do t’i mbyllë të gjitha pikat e kalimit kufitar në kufirin estonezo-rus nga 1 dhjetori”, ka deklaruar ministri i Jashtëm i Estonisë, Margus Tsahkna, përmes një postimi në rrjetin social X.
Sipas tij, autoritetet estoneze disponojnë prova të qarta që implikojnë inteligjencën ushtarake ruse (GRU) në një tentativë sabotimi, të ndodhur të premten mbrëma, ndaj një kompanie prodhuese të dronëve, në afërsi të kryeqytetit Tallinn.
Për sulmin ka njoftuar edhe kryeministri i Estonisë, Kristen Michal. Ngjarja ka ndodhur në Viimsi, në veri të Tallinnit, ku ishte cak kompania “Threod Systems”, e specializuar në prodhimin e dronëve për zbulim dhe sulm.
Tentativa u parandalua falë ndërhyrjes së ekipeve të sigurisë së kompanisë. Prokurorja e Përgjithshme, Astrid Asi, bëri të ditur të dielën se në lidhje me rastin janë arrestuar tetë persona, banorë të Letonisë.
Estonia: Pjesë e luftës hibride të Rusisë kundër Evropës
Kryeministri estonez e cilësoi incidentin si pjesë të një fushate më të gjerë të luftës hibride që Rusia, sipas tij, po zhvillon kundër Evropës, me synimin për të dobësuar mbështetjen për Ukrainën dhe për të ulur presionin ndërkombëtar ndaj Moskës.
Ndërkaq, ministri i Jashtëm, Margus Tsahkna, tha se mbyllja e pikave kufitare do të kufizojë mundësitë e Rusisë për të zhvilluar aktivitete armiqësore në territorin estonez dhe do të forcojë përpjekjet për të parandaluar shmangien e sanksioneve.
Estonia, anëtare e Bashkimit Evropian dhe NATO-s, deri më tani ka mbajtur të hapura tri pika kufitare me Rusinë: Narva, Luhamaa dhe Koidula, për qarkullimin e këmbësorëve dhe transportin e mallrave.
Kalimi i automjeteve në pikën kufitare të Narvës ishte pezulluar nga pala ruse në shkurt të vitit 2024.
