Në konferencën shkencore “Gjuha shqipe në diasporë”, të organizuar nga Universiteti i Shkodrës “Luigj Gurakuqi”, ai trajtoi dallimin mes gjuhës së parë dhe asaj të certifikuar në familjet shqiptare në Zvicër, transmeton albinfo.ch.
Lirim Begzati ka marrë pjesë si panelist në konferencën shkencore “Gjuha shqipe në diasporë – Mësimdhënia, certifikimi, kultura dhe identiteti”, e cila u mbajt më 17 nëntor 2026 në Universitetin e Shkodrës “Luigj Gurakuqi”.
Në kuadër të konferencës, Begzati prezantoi temën “Gjuha e parë dhe gjuha e certifikuar: shqipja si gjuhë trashëgimie në familjet e diasporës shqiptare në Zvicër”.
Konferenca trajtoi çështje që lidhen me mësimdhënien dhe certifikimin e gjuhës shqipe në diasporë, si dhe rolin e saj në ruajtjen e kulturës dhe identitetit shqiptar.
Sipas agjendës së publikuar, në konferencë u diskutuan edhe modelet institucionale të mësimit të shqipes në diasporë, kuadri kurrikular dhe formimi e certifikimi i mësuesve të gjuhës shqipe./Albinfo.ch