Skip to content

Stuhitë e fuqishme në Zvicër shkaktuan dëme prej mbi 270 milionë frangash

Keystone (AP Photo/Vadim Ghirda)

Stuhitë e shoqëruara me breshër, që goditën disa kantone të Zvicrës në fund të gushtit, shkaktuan dëme të konsiderueshme materiale. Në kantonet Aargau dhe Solothurn janë regjistruar rreth 29 mijë kërkesa për kompensim, ndërsa dëmet vlerësohen në mbi 270 milionë franga zvicerane.

Pamjet e stuhisë së 28 gushtit tronditën opinionin në Zvicër. Në autostradën A1, në afërsi të Birrfeldit, një kamion u përmbys mbi një automjet transportues, ndërsa një shtyllë e madhe elektrike ra mbi një objekt afarist. Breshëri shkaktoi dëme në automjete, ndërtesa, çati dhe sisteme të paneleve solare. Nga moti i lig pati edhe persona të lënduar.

Sipas të dhënave të publikuara nga televizioni publik zviceran SRF, dëmet rezultuan dukshëm më të mëdha sesa vlerësimet fillestare.

Në kantonin Aargau, dëmet arrijnë në 120 milionë franga

Sigurimi Kanton al i Ndërtesave në Aargau (AGV) ka bërë të ditur se dëmet e shkaktuara nga stuhia vlerësohen në rreth 120 milionë franga zvicerane. Fillimisht, vlerësimet ishin rreth 30 milionë franga.

Ky institucion ka regjistruar rreth 14 mijë kërkesa për kompensim. Përveç dëmeve të vogla në grila dhe tenda diellore, stuhia ka dëmtuar edhe çati të tëra dhe instalime solare. Rreth 2 mijë raste konsiderohen dëme të mëdha.

Drejtori i AGV-së, André Meier, ka bërë të ditur se për përpunimin e kërkesave është angazhuar edhe personel shtesë për disa muaj. Megjithatë, institucioni nuk planifikon rritjen e primeve të sigurimit, pasi ka rezerva financiare të mjaftueshme për të përballuar dëme të tilla.

Në Solothurn, dëmet tejkalojnë 150 milionë franga

Situata është edhe më e rëndë në kantonin fqinj të Solothurnit, ku dëmet vlerësohen në mbi 150 milionë franga zvicerane. Sipas Sigurimit Kanton al të Ndërtesave në Solothurn (SGV), janë prekur rreth 15 mijë objekte.

Drejtori i këtij institucioni, Thomas Fluri, ka deklaruar se në historinë mbi 200-vjeçare të sigurimit kantonal nuk është regjistruar më parë një ngjarje e përmasave të tilla.

Rreth dy të tretat e rasteve të dëmeve tashmë janë trajtuar. Edhe ky institucion nuk parasheh rritje të primeve të sigurimit për vitin 2027, ndërsa ndikimi financiar për vitin 2028 do të shqyrtohet më vonë. SGV disponon rezerva financiare prej rreth 370 milionë frangash.

Paralajmërohet shpeshtim i ngjarjeve ekstreme të motit

Autoritetet e sigurimeve u kanë bërë thirrje pronarëve të ndërtesave që të përdorin materiale më rezistente ndaj breshrit, veçanërisht për çatitë dhe instalimet fotovoltaike.

Sipas Thomas Flurit, jo të gjitha ndërtesat dhe panelet solare mund t’u rezistojnë kokrrave të breshrit me madhësi deri në pesë centimetra.

Ai ka paralajmëruar se, sipas vlerësimeve, ngjarjet ekstreme të motit pritet të ndodhin më shpesh në të ardhmen sesa deri më tani.