Skip to content

Këto janë fjalëkalimet më të përdorura në Zvicër

screnosht

Një studim i ri zbulon 20 fjalëkalimet më të përdorura në Zvicër. Në krye renditet “feurio”, i ndjekur nga kombinimi i njohur “123456”. Shumë prej tyre konsiderohen të pasigurta dhe mund të thyhen lehtësisht nga hakerët.

Sa të sigurta janë fjalëkalimet që përdorim çdo ditë për llogaritë tona online? Kësaj pyetjeje i është përgjigjur një studim i realizuar nga menaxheri i fjalëkalimeve NordPass, në bashkëpunim me kompaninë e sigurisë kibernetike NordLayer, përcjell albinfo.ch.

Në edicionin e tetë të këtij studimi vjetor janë analizuar 200 fjalëkalimet më të përdorura në nivel global dhe në 44 shtete. Përveç renditjes botërore, hulumtimi paraqet edhe 20 fjalëkalimet më të përdorura në Zvicër.

Në nivel global, kombinimi “123456” vazhdon të jetë në vendin e parë, i ndjekur nga “admin” dhe “12345678”. Ndërsa në Zvicër, renditja paraqet një rezultat ndryshe.

“Feurio” kryeson në Zvicër

Në krye të listës zvicerane gjendet fjalëkalimi “feurio”, i ndjekur nga “123456”. Në mesin e fjalëkalimeve të tjera të përdorura shpesh janë edhe “tretre33”, “admin” dhe “reggae1928”.

Studimi tregon se shumë përdorues vazhdojnë të zgjedhin kombinime të thjeshta, të cilat mund të zbulohen lehtësisht përmes programeve automatike që përdoren për thyerjen e fjalëkalimeve.

Nga Metallica te “Skibidi Toilet”

Zgjedhja e fjalëkalimeve ndikohet edhe nga muzika, filmat, videolojërat dhe fenomenet e internetit.

Në listat e analizuara shfaqen emra të grupeve muzikore si “Metallica” dhe “Slayer”, si dhe referenca nga filmat, përfshirë “Corleone” dhe “Rambo”.

Edhe anime-t dhe videolojërat kanë lënë gjurmë në këtë drejtim. Fjalëkalime si “sasuke”, “Narutofoda2”, “Bleach15” dhe “kingdomhearts3” janë disa nga shembujt e evidentuar.

Në vitet e fundit, në mesin e fjalëkalimeve të përdorura janë shfaqur edhe emra si “Minecraft”, “insta123”, “telegram”, si dhe emrat e sportistëve të njohur, përfshirë “neymar10” dhe “Lebron0319”.

Fenomenet më të reja të internetit pasqyrohen edhe në kombinime si “skibiditoilet”, “squidgamethebest” dhe “roblox.com1”. Madje, edhe pandemia ka lënë gjurmë në fjalëkalime, me kombinime si “Covid@19” dhe “corona2020”.

Fjalëkalimet e lehta mund të rrezikojnë llogaritë

Sipas analizës, përdorimi i emrave të grupeve të preferuara, klubeve sportive, personazheve apo datave të rëndësishme personale nuk përbën domosdoshmërisht mbrojtje të sigurt.

Përkundrazi, këto informacione mund të jenë lehtësisht të parashikueshme, veçanërisht kur përdoruesit i ndajnë publikisht interesat e tyre në rrjetet sociale.

Prandaj, ekspertët e sigurisë kibernetike rekomandojnë përdorimin e fjalëkalimeve të gjata, unike për secilën llogari dhe aktivizimin e verifikimit me dy faktorë. /Albinfo.ch