Një pritje e pazakontë diplomatike ka shoqëruar mbërritjen e presidentit amerikan, Donald Trump, në qytetin Shenzhen të Kinës, ku presidenti kinez, Xi Jinping, e ka pritur personalisht në aeroport. Pamjet e transmetuara drejtpërdrejt treguan momentin kur dy liderët u përshëndetën dhe më pas u përqafuan, përcjell albinfo.ch.
Përqafimet gjatë vizitave zyrtare të liderëve shtetërorë janë mjaft të rralla në diplomacinë kineze. Një gjest i tillë nga Xi ishte parë më herët edhe gjatë takimeve me presidentin rus, Vladimir Putin, të cilin udhëheqësi kinez e ka cilësuar vazhdimisht si një “mik të vjetër”.
Megjithatë, edhe gjatë vizitës së fundit të Putinit në Shenzhen për takimin e APEC-ut, Xi nuk e kishte pritur personalisht në aeroport. Në vend të tij, pritjen e kishte bërë Cai Qi, shefi i kabinetit të presidentit kinez dhe një prej bashkëpunëtorëve të tij më të afërt.
Trump kishte paralajmëruar më herët për një përqafim
Për mundësinë e një përqafimi me Xi Jinping, Trump kishte folur edhe para vizitës së tij në Kinë. Në muajin prill, në një postim në internet, presidenti amerikan kishte shkruar se Xi do t’i jepte një “përqafim të madh” gjatë vizitës së tij të planifikuar.
Megjithatë, gjatë qëndrimit të Trumpit në kryeqytetin kinez në mesin e muajit maj, si dhe gjatë vizitës së Xit në Uashington në shtator, dy presidentët nuk ishin përqafuar.
Kësaj radhe, përshëndetja në aeroportin e Shenzhenit mori një dimension të veçantë, duke u dalluar nga protokolli i zakonshëm diplomatik mes dy fuqive botërore. /Albinfo.ch