Skip to content

Reshjet e dendura shkaktojnë rrëshqitje shkëmbi në Zvicër, mbyllet një rrugë kantonale

Një masiv shkëmbor ka rënë në rrugën mes Meien dhe Färnigen, në kantonin Uri, duke dëmtuar edhe një linjë elektrike. Ndërkohë, në kantonin St. Gallen, një pemë ka rënë mbi një veturë në lëvizje, duke lënduar lehtë shoferen 43-vjeçare.

Reshjet e dendura të shiut kanë shkaktuar të martën rënien e një masivi shkëmbor në rrugën kantonale mes Meien dhe Färnigen, në kantonin Uri. Sipas autoriteteve, incidenti ka dëmtuar rrugën dhe një linjë të furnizimit me energji elektrike, përcjell albinfo.ch.

Pas një kontrolli me dron dhe një inspektimi në terren të mërkurën në mëngjes, autoritetet kanë konstatuar se nuk ekziston rreziku për rënie të tjera shkëmbinjsh.

Megjithatë, rruga do të mbetet e mbyllur deri të enjten, për t’u mundësuar ekipeve përfundimin e punimeve të riparimit. Në operacion janë angazhuar punonjësit e mirëmbajtjes së rrugëve kantonale, shërbimi për rreziqet natyrore dhe kompania energjetike energieUri.

Një tjetër incident i shkaktuar nga moti i keq është regjistruar të martën pasdite në rrugën shtetërore mes Bischofszell dhe Sorntal, në kantonin St. Gallen, ku një pemë ka rënë mbi një veturë në lëvizje.

Në automjet ndodheshin një grua 43-vjeçare dhe një vajzë 13-vjeçare. Sipas Policisë Kantonale të St. Gallenit, shoferja ka pësuar lëndime të lehta.

Njoftimi për aksidentin është pranuar në qendrën e emergjencës pak para orës 14:45. Vetura po udhëtonte në zonën e pyllit të Bischofszellit, kur një pemë pranë rrugës u rrëzua dhe goditi automjetin.

Dy personat u nxorën nga vetura nga kalimtarë të rastit, para se të mbërrinin ekipet e emergjencës. Më pas, të dyja iu nënshtruan kontrollit mjekësor. Policia nuk ka dhënë informacione për gjendjen shëndetësore të vajzës.

Dy punonjës pylli që ndodheshin në afërsi nisën menjëherë largimin e pemës nga rruga. Aksidenti shkaktoi pengesa në qarkullim, ndërsa dëmi material ende nuk është përcaktuar.

Sipas vlerësimeve fillestare, pema nuk u ka rezistuar fuqive të erës që mbizotëronin në momentin e aksidentit.

Të martën, një front i ftohtë atmosferik përfshiu Zvicrën. MeteoSwiss kishte lëshuar paralajmërim për stuhi të nivelit 3 në disa rajone, ndërsa në zonat mbi 1’800 metra lartësi priteshin erëra me shpejtësi prej 100 deri në 140 kilometra në orë./Albinfo.ch