Në Konsullatën e Përgjithshme të Kosovës në Shtutgart, më 14 dhe 15 nëntor 2026, u mbajt një seminar profesional për mësimdhënësit e gjuhës shqipe në Baden-Württemberg, përcjell albinfo.ch.
Seminari kishte temën “Mësimdhënia e gjuhës shqipe në klasat heterogjene: Kurrikula, metodologjia dhe shkëmbimi i përvojave” dhe u udhëhoq nga trajnerët nga Kosova, Shemsedin Beqiri dhe Lavdim Klinaku.
Sipas njoftimit të Konsullatës, gjatë dy ditëve u trajtuan çështje që lidhen me kurrikulën, planifikimin dhe metodologjitë e mësimdhënies. Vëmendje e veçantë iu kushtua punës me nxënës të grupmoshave dhe niveleve të ndryshme të njohjes së gjuhës shqipe.
Përmes punës praktike dhe diskutimeve, mësimdhënësit shkëmbyen përvojat e tyre dhe shqyrtuan mundësi konkrete për përmirësimin e procesit mësimor. Në fokus ishte edhe roli i shkollës shqipe në ruajtjen e gjuhës dhe identitetit kombëtar te brezat e rinj në diasporë.
Konsullata bëri të ditur se ky ishte seminari i parë i këtij formati i organizuar prej saj në Shtutgart, me synim mbështetjen profesionale të mësimdhënësve dhe zhvillimin e mëtejshëm të mësimit plotësues të gjuhës shqipe.
Aktiviteti u realizua me mbështetjen e Ministrisë së Arsimit dhe Shkencës dhe Departamentit për Diasporë në Ministrinë e Punëve të Jashtme dhe Diasporës.
Në njoftim, Konsullata falënderoi mësimdhënësit për pjesëmarrjen dhe përkushtimin në përcjelljen e gjuhës shqipe te fëmijët që jetojnë dhe rriten jashtë atdheut./Albinfo.ch