Skip to content

Prezantohet roboti i parë tokësor pa ekuipazh i prodhuar në Kosovë për FSK-në

Roboti me numër serik SR-4-001-KS është prodhuar nga kompania kosovaro-amerikane STRIDAR dhe i është dhuruar Ministrisë së Mbrojtjes për nevojat e Forcës së Sigurisë së Kosovës.

Forca e Sigurisë së Kosovës (FSK) do të ketë në dispozicion një robot tokësor pa ekuipazh (UGV), të prodhuar në Kosovë nga kompania kosovaro-amerikane STRIDAR, transmeton albinfo.ch. 

Lajmin e ka bërë të ditur ministri i Mbrojtjes, Ejup Maqedonci, i cili ka njoftuar se roboti me numër serik SR-4-001-KS i është dhuruar Ministrisë së Mbrojtjes për nevojat e FSK-së.

Sipas Maqedoncit, ky është roboti i parë tokësor pa ekuipazh i prodhuar në Kosovë dhe përbën një hap të rëndësishëm në zhvillimin e industrisë vendore të mbrojtjes.

UGV-të janë mjete robotike që mund të kontrollohen nga distanca ose të kryejnë detyra të caktuara në mënyrë autonome. Varësisht nga modeli dhe konfigurimi, ato mund të përdoren për vëzhgim, transport të pajisjeve dhe mbështetje në zona me rrezik, si dhe të pajisen me sisteme armatimi të kontrolluara nga distanca.

Ministri Maqedonci ka bërë të ditur se marrëveshjen për këtë donacion e ka nënshkruar së bashku me përfaqësuesin e kompanisë STRIDAR, Nils Alstad.

Ai e ka falënderuar kompaninë për kontributin dhe angazhimin në zhvillimin e kapaciteteve vendore, duke vlerësuar se prodhimi i sistemeve të tilla dëshmon potencialin e teknologjisë vendore në fushën e mbrojtjes dhe atë civile./Albinfo.ch