Ka përfunduar vizita e ish-kryetarit të Kuvendit të Kosovës, Jakup Krasniqi, ng Haga ku po vuan dënimin, në Kosovë. Pas katër ditësh të kaluara pranë familjes, për shkak të gjendjes shëndetësore të bashkëshortes, Krasniqi do të kthehet në Hagë. Ai u largua nga shtëpia mes lotësh dhe përqafimesh. Gjatë qëndrimit katërditor në Kosovë, u përcoll me masa të shtuara sigurie nga EULEX-i dhe Policia e Kosovës.
Jakup Krasniqi, ish-zëdhënës i Ushtrisë Çlirimtare të Kosovës dhe ish-kryetar i Kuvendit të Kosovës, nën praninë e shtuar të EULEX-it dhe Policisë së Kosovës, nisi ditën e katërt të vizitës në shtëpinë e tij, pranë familjes.
Nga ballkoni, ardhjen e tij e pritën edhe familjarët e tjerë, të cilët, për tri ditë me radhë, nuk kishin pasur mundësi ta takonin.
Me afrimin e mesditës, nisën të grumbulloheshin edhe familjarët e tjerë.
Ndërsa ora 12.00 po afrohej, veturat e EULEX-it u afruan pranë shtëpisë së Krasniqit.
Mes emocionesh dhe përqafimesh, Krasniqi doli nga shtëpia, i përcjellë nga familjarët.
Për të pranishmit që nuk pati mundësi t’i takonte nga afër, ai dha një përshëndetje. Edhe familjarët, nga distanca, nuk i kursyen përshëndetjet.
Pas kësaj, Krasniqi u nis nga shtëpia e tij, për të udhëtuar drejt Hagës.
Vizita e Jakup Krasniqit, ish-zëdhënësit të UÇK-së dhe ish-kryeparlamentarit, përfundoi. Nën masa të shtuara sigurie nga EULEX-i dhe Policia e Kosovës, ai u largua nga shtëpia e tij në Velani, ku për katër ditë u çmall me familjarët e tij.
Pas largimit të Jakup Krasniqit, vëllezërit e tij shkuan në shtëpinë e tij, ku deri në mesditë nuk kishin mundur të hynin.
Kjo ishte vizita e dytë e Jakup Krasniqit në Kosovë, që nga dërgimi i tij në Hagë, më 4 nëntor 2020.
Altin Krasniqi falënderon në emër të familjes
I biri i Jakup Krasniqit deputeti i PDK-së, Altin Krasniqi ka reaguar për herë të parë pas vizitës së babait të tij, Jakup Krasniqit, duke shprehur mirënjohje dhe falënderim për të gjithë personat që qëndruan pranë familjes së tij në këto momente të vështira.
Përmes një postimi, Krasniqi ka falënderuar të gjithë ata që u solidarizuan me familjen, duke theksuar se mbështetja e tyre u ka dhënë forcë përballë kësaj situate.
“Në emër të familjes, shpreh mirënjohjen dhe falënderimin tonë për secilin prej jush që, në këto momente të vështira për familjen tonë, u solidarizuat me ne dhe na dhatë forcë”, ka shkruar Krasniqi