Skip to content

Mbi 12 mijë persona i bashkohen fushatës “Një muaj pa duhan” në Zvicër

Keystone

Mbi 12 mijë persona po marrin pjesë në fushatën “Një muaj pa duhan” në Zvicër, duke shënuar numrin më të lartë të pjesëmarrësve që nga nisja e saj në vitin 2022. Prej tyre, mbi 6.150 janë nga pjesa frankofone e vendit.

Fushata synon t’i inkurajojë duhanpirësit që gjatë muajit nëntor të ndërpresin përdorimin e cigareve dhe produkteve të tjera të nikotinës, duke u ofruar këshilla falas nga profesionistët shëndetësorë, mbështetje online dhe grupe komunikimi në WhatsApp.

Sipas një ankete të realizuar më 2024, më shumë se gjysma e pjesëmarrësve kishin vazhduar të mos pinin duhan edhe gjashtë muaj pas përfundimit të programit. Ndërkaq, deri në 90 për qind kishin arritur ta reduktonin konsumin e duhanit ose produkteve të nikotinës. Megjithatë, organizatorët theksojnë se këto rezultate duhen interpretuar me kujdes, për shkak të numrit të kufizuar të përgjigjeve në anketë.

Ekspertët vlerësojnë se ndërprerja e duhanpirjes kërkon mbështetje afatgjatë, pasi varësia nuk është vetëm fizike, por lidhet edhe me zakonet e përditshme. Ata theksojnë gjithashtu rëndësinë e masave parandaluese, si ndalimi i reklamimit të duhanit, rritja e çmimeve dhe rregullimi më i rreptë i produkteve të nikotinës.

Pavarësisht rritjes së interesimit për ndërprerjen e duhanpirjes, Zvicra vazhdon të përballet me sfida në politikat e parandalimit dhe me ndikimin e industrisë së duhanit në vendimmarrjen publike. Ekspertët rikujtojnë se lënia e duhanit sjell përfitime shëndetësore në çdo moshë.