Konsumi i verës në nivel global ka rënë në nivelin më të ulët që nga viti 1957, ndërsa ekspertët paralajmërojnë se kjo prirje mund të vazhdojë edhe në dekadat e ardhshme.
Sipas Organizatës Ndërkombëtare të Verës dhe Hardhisë (OIV), rënia lidhet kryesisht me ndryshimin e zakoneve të konsumit dhe interesimin gjithnjë e më të vogël të gjeneratave të reja për verën.
Në Gjermani, 77 për qind e verës konsumohet nga personat mbi moshën 55-vjeçare, ndërsa të rinjtë konsumojnë dukshëm më pak. Ekspertët e lidhin këtë prirje me shqetësimet për shëndetin, kujdesin ndaj konsumit të alkoolit dhe kalorive, çmimet e larta, si dhe ndryshimin e mënyrës së jetesës.
Një studim i Universitetit të Torinos, i realizuar me afro 33 mijë persona në gjashtë vende – SHBA, Japoni, Kinë, Gjermani, Francë dhe Itali – tregon se përqindja e konsumatorëve që blejnë rregullisht verë ka rënë nga 60 në 46 për qind brenda disa vitesh.
Rënia e konsumit është evidente edhe në Zvicër. Gjatë vitit 2025, konsumi i përgjithshëm arriti në 211 milionë litra, rreth 3 për qind më pak se një vit më parë. Vera e kuqe shënoi rënie prej 5,5 për qind, ndërsa ajo e bardhë një rritje të lehtë prej 0,5 për qind. Ndërkohë, konsumi i verërave të gazuara ra me 6 për qind.
Përballë kësaj situate, ekspertët vlerësojnë se industria e verës duhet të përshtatet me preferencat e reja të konsumatorëve, duke investuar më shumë në promovim, informim dhe forma më tërheqëse të prezantimit të produktit. Interesim në rritje po shënojnë edhe verërat me përmbajtje më të ulët alkooli.
Në Zvicër, autoritetet po shqyrtojnë masa për mbështetjen e sektorit, përfshirë zvogëlimin e sipërfaqeve të vreshtave, promovimin e verërave vendore dhe përshtatjen e rregullave të importit.