Pritje të gjata në kufirin Zvicër-Francë

Keystone

Atentatet e fundit terroriste që ndodhën në Paris kanë bërë që Franca të përforcojë masat e kontrollimit në kufijtë e saj me shtetet tjera. Nga kjo është prekur edhe Zvicra, në kuptimin që janë zgjatur ndjeshëm pritjet në vendkalimet kufitare në mes të saj dhe Francës.

Kështu, siç njofton transmetuesi publik SRF, në mëngjesin e sotëm njerëzit që kanë kaluar kufirin në doganën St. Luis të autostradës që lidh dy shtetet janë detyruar të presin deri në 40 minuta. Këtë e ka konfirmuar për SRF një zëdhënës i rojave kufitare në Bazel. Ai nuk ka pasur informata nëse kontrollimet e shtuara nga ana franceze do të vazhdojnë edhe në ditët e ardhshme.

Rojat kufitare të Zvicrës kanë përforcuar kontrollimin po ashtu. Por ajo me personelin e mangët që ka, është e stërngarkuar për shkak të ardhjes së vazhdueshme të refugjatëve nga Gjermania.