Rritet kostoja e shërbimeve ambulantore në Zvicër

Sfera e shërbimeve ambulantore brenda spitaleve ka pasur gjatë vitit 2014 një kosto prej 6.7 miliardë frangash, që përbën një rritje prej 5.4% në krahasim me vitin paraprak

Gjatë vitit 2014 në Zvicër janë zhvilluar gjithsej 116.8 milionë konsultime mjekësore ambulantore dhe 1.4 milion qëndrime në spitale. Por, shpenzimet në sferën ambulantore janë rritur më shpejtë se ato në sferën stacionare (të qëndrimit në spitale). Një trend i tillë është duke u shënuar tashmë pesë vjet me radhë, bëhet e ditur në një komunikatë të Zyrës Federale të Statistikës (BFS) të publikuar sot.
Sa u përket pajisjeve, spitalet janë të pajisura me aparatura të avancuara (për fotografime medicinale nga më të ndryshmet etj.), të cilat më shpesh shfrytëzohen në sferën ambulantore.
Sfera e shërbimeve ambulantore brenda spitaleve ka pasur gjatë vitit 2014 një kosto prej 6.7 miliardë frangash, që përbën një rritje prej 5.4% në krahasim me vitin paraprak. Ndërsa kostoja e qëndrimeve stacionare spitalore ka qenë 17.9 miliardë franga, dhe ka shënuar një rritje prej 3.9%.
Mesatarisht një qëndrim spitalor kushton 12.800 franga për një pacient, ose 300 franga më tepër se që ka kushtuar në vitin 2013. Ndërsa kostoja mesatare ambulantore në pesë vitet e fundit është rritur 2 për qind më shumë se ajo në shërbimet spitalore.
46000 konsultime ambulantore në ditë janë kryer në spitale gjatë vitit 2014. Pothuajse një e katërta (23%) e të gjitha konsultimeve ambulantore në përgjithësi, ku hyjnë kirurgjia ditore, rrezatimet, endoskopia etj. realizohen në pesë spitalet universitare të Zvicrës.

39% e pjesës tjetër të konsultimeve kryhen në 34 spitalet tjera të mëdha, te përgjithshme dhe 19% në spitalet tjera, të vogla. Ndërsa pjesa e mbetur ndahet në klinikat specialistike, si 9% në klinikat psikiatrike dhe 10% në klinikat me specializime si rehabilitimi, kirurgjia ose pediatria.