A duhet që të huajt edhe më tutje t`i “zviceranizojnë” mbiemrat e tyre?

Më të prekurit nga kjo dukuri janë të natyralizuarit nga vendet e ish Jugosllavisë, shkruan. Mbaresa karakteristike me “ic” (ku mbi c vuhet shenja specifike ` ) e mbiemrave të të ardhurve nga këto shtete, në dokumentet zvicerane mbetet e cunguar

Në rastet kur shtetasit e huaj natyralizohen, ndodh jo rrallë që të ndryshohen emrat e tyre nga fakti se sistemi informativ i këtushëm nuk i njeh disa shkronja specifike të gjuhëve të ndryshme. Këshilli Federal e konsideron të pakënaqshme këtë gjendje por pa mundur që të sjellë një zgjidhje të shpejtë problemit.

Më të prekurit nga kjo dukuri janë të natyralizuarit nga vendet e ish Jugosllavisë, shkruan sda.ch. Mbaresa karakteristike me “ic” (ku mbi c vuhet shenja specifike ` ) e mbiemrave të të ardhurve nga këto shtete, në dokumentet zvicerane mbetet e cunguar, për mungesë të shenjës së përmendur, transmeton albinfo.ch. Te prekur nga kjo anomali janë po ashtu edhe të natyralizuarit nga vende si: Çekia, Polonia, Hungaria. Letonia, Lituania dhe Turqia.

Duke u marrë me këtë problem, deputeti nacional ng SP-ja, Cedric Wermuth ka thënë se është një gjendje e papranueshme , e cila të përkujton pikëpamjen sipas të cilës me integrim nënkuptohet asimilimi. Për këtë arsye ai, duke iu drejtuar Këshillit Federal ka deklaruar se e dënon “zviceranizimin e dekretuar zyrtarisht” të emrave. Ai po ashtu ka pyetur nëse qeveria me rastin e përtëritjes së  regjistrit të emrave personalë Infostar do të pranohen edhe shenjat specifike si ajo te mbiemrat kroatë (c me shenjë lart).

Ndërsa Këshilli Federal në përgjigjen e publikuar sot ka shkruar se gjatë muajve në vijim, në sistemin Infostar edhe mund të futen shenjat specifike, përcjell albinfo.ch. Por kjo nuk do të sillte një gjendje të kënaqshme pasi që Infostar është i lidhur me një numër të madh regjistrash që shërbejnë për qëllime të ndryshme në administratë.

Në rast se Infostar do të zgjerohej kjo do të shkaktonte bllokada informatike dhe do të rrezikohej këmbimi i të dhënave, thuhet më tutje në përgjigjen e Këshillit Federal. Kështu, një zgjerimi shenjave ekzistuese standarde duhet të koordinohet dhe të jetësohet si në nivel kantonesh ashtu dhe në nivel komunash.

Qeveria e vendit po ashtu ka kumtuar me këtë rast se për fillim të vitit të ardhshëm është planifikuar një komunikim në mes të zyrtarëve të regjistrave civilë mbi këtë tematikë, transmeton albinfo.ch. Qeveria po ashtu thekson se është duke bërë përpjekje që të intensifikojë punën në mënyrë që regjistrat e emrave personalë sa më shpejt të kenë mundësi t`i pranojnë në mënyrë korrekte edhe shenjat specifike si C-ja kroate.