A më kërkohet testi në Zvicër pas çdo blerjeje në Gjermani?

Nëse blini në një vend të huaj afër kufirit, nuk keni pse të testoheni sa herë që ktheheni në Zvicër, njofton autoriteti doganor i Zvicrës

Nga e hëna, të gjithë të pavaksinuarit do të duhet të bëjnë dy teste të koronës kur të hyjnë në Zvicër nga jashtë. Megjithatë, nga ky rregull përjashtohen ata që shkojnë për të blerë në rajonet kufitare me Zvicrën, shkruan 20minuten.ch.

Të gjithë personat që nuk janë vaksinuar ose nuk janë shëruar duhet të tregojnë një test negativ gjatë hyrjes – pavarësisht nga mjetet e transportit që përdorin, transmeton albinfo.ch. Ndërsa testi i dytë duhet të kryhet pas katër deri në shtatë ditë në Zvicër.

Nga ana tjetër,  edhe të vaksinuarit dhe të shëruarit duhet të plotësojnë një formular hyrjeje.

Personat që hyjnë nga zonat kufitare përjashtohen nga ky test dhe detyrimi për plotësim formulari. Këtu përfshihen, për shembull, landet gjermane në kufi me Zvicrën si Baden-Württemberg dhe Bavaria, pastaj Tiroli në Austri dhe Lombardia në Itali.

Kështu, nëse blini në një vend të huaj afër kufirit, nuk keni pse të testoheni sa herë që ktheheni në Zvicër.

Kontrollohen targat e automjetit

Kontrollet e rastësishme kryhen për të siguruar që një person me të vërtetë po hyn në Zvicër nga një zonë kufitare, përcjell albinfo.ch. Pastaj targat e automjeteve dhe dokumentet e identifikimit kontrollohen dhe bëhen sondazhe, ka shpjeguar Drejtori i Doganave, Christian Bock në konferencën për media të Këshillit Federal.

 

---