Abazoviq: Duhet rrugë e shpejtë për anëtarësim të Ballkanit Perëndimor në BE

foto/ facebook/ Dritan Abazovic

Në një prononcim për media, zv.kryeministri i Malit të Zi, Dritan Abazoviq, i ka bërë thirrje Bashkimit Evropian që të përshpejtojë proceset e anëtarësimit të vendeve që kërkojnë të anëtarësohen në bllok, në mënyrë që skenarë të ngjashëm si në Ukrainë të mos ndodhin në rajone të tjera të Evropës.

“Ky moment është shumë vendimtar për Evropën, ndoshta edhe për botën. Shpresoj që lufta ruse të ndalet menjëherë. Por, ne duhet të dërgojmë një mesazh që BE-ja ta kuptojë se vendet që duan t’i bashkohen dhe janë shumë larg në procesin e zgjerimit, duhet të kenë një, le të themi, një rrugë të shpejtë në këtë moment nëse ne nuk duam të kemi të njëjtin problem si në pjesën tjetër të Evropës”, tha Abazoviq për Anadolu.

Ai tha se Mali i Zi do të vazhdojë të zbatojë sanksionet ndaj Rusisë dhe se brenda vendit të tij do të gjurmohen pronat e oligarkëve rusë. Abazoviq theksoi se vendi, pavarësisht përmasave të vogla, mbështet plotësisht partnerët e NATO-s dhe BE-së.