Afrim Gashi është zgjedhur kryetar i Kuvendit të Maqedonisë së Veriut

Deputeti i Koalicionit VLEN, Afrim Gashi është zgjedhur kryetar i Kuvendit të Maqedonisë së Veriut.

Gashi është propozuar si kandidat për kryetar Kuvendi nga 75 deputetë të shumicës së re, transmeton albinfo.ch.

PËR Gashin votuan 76 deputetë, 6 kundër dhe asnjë i përmbajtur.

Gashi ka qenë bartës i listës së deputetëve të VLEN në zonën e dytë zgjedhore. Deri ditën e djeshme (27 maj) ai ka qenë kryetar i partisë Alternativa.

Në diskutimin e sotëm, të paraqitur për të diskutuar për zgjedhjen e Gashit kryetar Kuvendi ishin paraqitur vetëm deputetët e partisë “Levica” të cilët thanë se OBRM-PDUKM-ja po kosovarizon Maqedoninë e Veriut. Deputetët e Frontit Evropian e lëshuan sallën e Kuvendit, gjatë diskutimit të rendit të ditës, zgjedhjen e kryetarit të Kuvendit. “Si kryetar, do të jem deputet i pushtetit dhe opozitës pasi dua që juve të ju garantohet e drejta e fjalës dhe qëndrimit personal”, tha mes tjerash Gashi.