Afro 8 mijë persona u dënuan për vjedhje në Zvicër gjatë vitit 2025

Statistikat e reja tregojnë se vjedhjet mbeten ndër veprat penale më të shpeshta në vend, ndërsa mbi 80 për qind e personave të dënuar kishin shtetësi të huaj.

Në Zvicër, gjatë vitit 2025, gjithsej 7956 persona u dënuan për vjedhje, duke e renditur këtë vepër ndër kategoritë më të shpeshta në statistikat e drejtësisë penale, përcjell albinfo.ch.

Kriminologu Dirk Baier nga Universiteti i Shkencave të Aplikuara të Cyrihut (ZHAW) e konsideron shifrën të lartë, por jo të papritur. Sipas tij, rreth dy të tretat e veprave penale në Zvicër lidhen me krimet kundër pronës, ku përfshihen vjedhjet e biçikletave, xhepave dhe vjedhjet në banesa.

Të dhënat tregojnë gjithashtu një përbërje të theksuar sipas shtetësisë. Nga afro 8 mijë personat e dënuar për vjedhje, rreth 1500 ishin shtetas zviceranë, ndërsa më shumë se 80 për qind kishin pasaportë të huaj. Ndër shtetësitë më të përfaqësuara ishin ato të Algjerisë dhe Rumanisë.

Një tjetër element i statistikave është se rreth dy të tretat e të dënuarve nuk i përkasin popullsisë së përhershme të Zvicrës. Baier i ndan ata kryesisht në dy grupe: persona nga sistemi i azilit dhe të ashtuquajturit turistë kriminalë.

Sipas ekspertit, vjedhjet janë ndër veprat që mund të kryhen relativisht lehtë, ndërsa faktorë si mungesa e perspektivës dhe gjendja e vështirë financiare mund të luajnë rol te disa persona.

Autoritetet zvicerane kanë ndërmarrë masa ndaj personave që kryejnë në mënyrë të përsëritur vepra penale. Sekretariati Shtetëror për Migracionin (SEM) ka bërë të ditur se një task-forcë për autorët e përsëritur përdor mundësitë ligjore për t’i mbajtur ata në paraburgim deri në largimin e tyre nga Zvicra. Në të njëjtën kohë, SEM thekson se vetëm një pakicë e azilkërkuesve kryen vepra penale. /Albinfo.ch

---