Aida Birinxhiku vlerësohet ndër figurat më të fuqishme të politikës suedeze

Deputetja shqiptare në Parlamentin suedez është renditur nga gazeta Expressen si personi më me ndikim në politikën suedeze në kategorinë e të rinjve nën moshën 30-vjeçare.

Një tjetër sukses i diasporës shqiptare vjen nga Suedia. Aida Birinxhiku, deputete në Parlamentin suedez (Riksdagen), është vlerësuar nga gazeta suedeze Expressen si personi më i fuqishëm në jetën politike suedeze në kategorinë e të rinjve nën moshën 30-vjeçare, transmeton albinfo.ch.

Ky vlerësim prestigjioz pasqyron ndikimin dhe angazhimin e saj në politikën suedeze, ku ajo është shquar si një zë i rëndësishëm në përfaqësimin e komunës së Falkenbergut dhe krahinës së Hallandit, si dhe në mbrojtjen e politikave që synojnë ndërtimin e një Suedie më të drejtë dhe gjithëpërfshirëse.

Që nga zgjedhja e saj në Parlamentin suedez, Birinxhiku ka qenë aktive në trajtimin e çështjeve me interes publik, duke fituar respekt si brenda partisë së saj, ashtu edhe në opinionin publik suedez.

Me zgjedhjet e përgjithshme që do të mbahen në shtator të këtij viti, Aida Birinxhiku synon të fitojë mandatin e saj të dytë parlamentar, me synimin për të vazhduar kontributin e saj në jetën politike të vendit.

Vlerësimi nga Expressen përbën një dëshmi të punës, përkushtimit dhe lidershipit të saj, duke e renditur ndër emrat më premtues të brezit të ri të politikës suedeze dhe njëkohësisht duke qenë një arsye krenarie për komunitetin shqiptar në diasporë./Albinfo.ch

---