Irani akuzon Francën për destabilizim të rajonit

@facbook Ilustrim

Irani zyrtar ka akuzuar Francën se është një faktor destabilizues në rajon, pas kërcënimeve të ministrit të Jashtëm francez, për sanksione të reja kundër Teheranit, për shkak të programit bërthamor.

“Republika islame ka bërë gjithmonë thirrje për ruajtje të paqes dhe stabilitetit në rajon”, thuhet në komunikatën e Ministrisë së Jashtme iraniane.

Ministri i Jashtëm francez, Jean Yves Le Drian, të premten tha se Parisi është i gatshëm të rrisë sanksionet ndaj Teheranit, nëse bisdimet për programin bërthamor dhe ndikimin rajonal nuk shënojnë progres.

“Ne kemi filluar një dialog të vështirë me Iranin dhe derisa nuk arrihet progres, ne jemi të gatshëm të vendosim sanksione, ata e dinë këtë gjë”, tha Le Drian, shkruan REL, përcjell albinfo.ch.

Ministria e Jashtme e Iranit u përgjigj ndaj këtyre kërcënimeve, duke thënë se “programi bërthamor i Iranit nuk është i negociushëm” dhe paralajmëroi se “sanksionet e shteteve evropiane ndaj Iranit do të vënë në pikëpyetje raportet mes Iranit dhe atyre shteteve”.

Marrëveshja bërthamore e Iranit ishte arritur në vitin 2015 në mesin e gjashtë fuqive të mëdha botërore si Britania, Kina, Franca, Gjermania, Rusia dhe Shtetet e Bashkuara.

Por, në maj të vitit 2018, SHBA-ja u tërhoq nga marrëveshja dhe rivendosi sanksionet ndaj Teheranit.