Disa fluturime në Evropë janë përballur të martën, më 3 nëntor, me kërcënime për bomba, duke shkaktuar devijime të avionëve, kontrolle të jashtëzakonshme të sigurisë dhe mbyllje të përkohshme të aeroporteve. Megjithatë, autoritetet kanë konfirmuar se të gjithë avionët kanë aterruar në mënyrë të sigurt dhe nuk janë gjetur mjete shpërthyese.
Dy prej incidenteve kanë ndodhur në fluturimet drejt kryeqytetit polak, Varshavës. Një avion i kompanisë Scandinavian Airlines (SAS), që udhëtonte nga Kopenhaga, ka aterruar në aeroportin Chopin, ku është kontrolluar nga ekipet e sigurisë. Për shkak të alarmit, njëra nga pistat e aeroportit është mbyllur përkohësisht.
Ndërkohë, një avion i kompanisë polake LOT, që udhëtonte nga aeroporti Heathrow i Londrës drejt Varshavës, është devijuar në aeroportin Modlin. Autoritetet kanë evakuuar pasagjerët dhe kanë kryer kontrolle të hollësishme, por nuk kanë gjetur asgjë të dyshimtë. Aeroporti është rihapur pas përfundimit të procedurave të sigurisë, shkruan AFP, transmeton albinfo.ch.
Një tjetër alarm është regjistruar në Spanjë, ku një avion i kompanisë Ryanair, që udhëtonte nga Mançesteri drejt Murcias, është përballur me një kërcënim për bombë. Autoritetet spanjolle kanë aktivizuar protokollet e emergjencës, ndërsa kontrollet e Gardës Civile kanë konfirmuar se nuk kishte eksplozivë në avion.
Edhe në Bullgari janë ndërmarrë masa të sigurisë pas kërcënimeve ndaj fluturimeve ndërkombëtare. Një avion i kompanisë Wizz Air, që kishte mbërritur nga Bergamo e Italisë, është kontrolluar në aeroportin e Sofjes.
Këto incidente pasojnë një tjetër alarm të regjistruar të hënën, kur një avion i Wizz Air, që udhëtonte nga Londra drejt Sofjes, u detyrua të devijonte në Budapest. Forcat ajrore hungareze ngritën avionë luftarakë Gripen për ta shoqëruar avionin e pasagjerëve deri në aterrimin e sigurt.
Seria e kërcënimeve ka shkaktuar shqetësime për sigurinë e transportit ajror evropian, megjithëse kontrollet e deritanishme nuk kanë zbuluar mjete shpërthyese.
Autoritetet po hetojnë rrethanat e këtyre alarmeve, ndërsa ende nuk është konfirmuar nëse incidentet janë të lidhura me njëri-tjetrin.
