Votuesit amerikanë zgjedhin të gjithë anëtarët e Dhomës së Përfaqësuesve dhe një pjesë të Senatit. Rezultati do të përcaktojë balancat politike në Kongres dhe hapësirën e Presidentit Donald Trump për të zbatuar agjendën e tij gjatë pjesës së mbetur të mandatit.
Shtetet e Bashkuara mbajnë sot zgjedhjet e mesmandatit, një proces i rëndësishëm që do të përcaktojë përbërjen e Kongresit dhe raportin e forcave mes republikanëve dhe demokratëve. Rezultati pritet të ketë ndikim të drejtpërdrejtë në aftësinë e presidentit Donald Trump për të çuar përpara politikat e administratës së tij, përcjell albinfo.ch.
Në këto zgjedhje janë në garë të 435 vendet në Dhomën e Përfaqësuesve, si dhe 35 nga 100 vendet në Senat. Gara kryesore zhvillohet mes republikanëve, të cilët synojnë të ruajnë shumicën, dhe demokratëve, që kërkojnë të rimarrin kontrollin e Kongresit.
Në orët e fundit të fushatës, kandidatët demokratë kanë intensifikuar aktivitetet në disa shtete ku garat konsiderohen të ngushta. Në Kansas, kandidati demokrat Adam Hamilton ka premtuar bashkëpunim dypartiak dhe ka vënë theksin te kostoja e jetesës dhe kujdesi shëndetësor. Ndërsa në Iowa, demokrati Josh Turek është përqendruar në çështjet ekonomike dhe sistemin shëndetësor në garën kundër republikanes Ashley Hinson.
Vëmendje të veçantë ka marrë edhe Teksasi, ku demokrati James Talarico synon një fitore kundër republikanit Ken Paxton. Gjatë fushatës në Austin, ai ka kritikuar ndikimin e miliarderëve në politikë dhe vështirësitë ekonomike të qytetarëve.
Edhe presidenti Donald Trump është përfshirë në përpjekjet e fundit për mobilizimin e votuesve republikanë, duke u bërë thirrje mbështetësve të tij të marrin pjesë masivisht në zgjedhje.
Kur mbyllen qendrat e votimit dhe kur priten rezultatet?
Procesi i votimit përfundon në orare të ndryshme, në varësi të shtetit. Mbylljet e para të qendrave priten në orën 18:00 sipas kohës lokale, ndërsa shtetet e tjera do ta përfundojnë votimin gjatë mbrëmjes dhe natës.
Rezultatet e para pritet të publikohen gjatë mbrëmjes, por numërimi mund të vazhdojë edhe në ditët në vijim. Votat e dërguara me postë dhe fletëvotimet e përkohshme mund të vonojnë shpalljen e rezultateve përfundimtare në garat më të ngushta.
Cilat janë garat kryesore?
Disa nga përballjet që po ndiqen me interes të veçantë janë ato në Michigan, Florida, Xhorxhia, Maine, New Hampshire dhe Karolinën e Veriut.
Në Senat, demokratëve u nevojitet të fitojnë katër vende neto për të siguruar shumicën, ndërsa në Dhomën e Përfaqësuesve u duhen tri vende.
Përballjet mes kandidatëve të të dyja partive në këto shtete mund të përcaktojnë se kush do ta kontrollojë Kongresin në periudhën e ardhshme.
Për administratën Trump, rezultati është veçanërisht i rëndësishëm, pasi shumica në Kongres ndikon drejtpërdrejt në miratimin e ligjeve, buxhetit dhe zbatimin e prioriteteve presidenciale. Humbja e kontrollit të njërës prej dhomave do t’ua shtonte demokratëve mundësitë për të penguar ose ndryshuar një pjesë të agjendës së presidentit./Albinfo.ch
