Ambasada e Kosovës në Bernë, në pushim nga 23 dhjetori deri më 3 janar

Ambasada e Republikës së Kosovës në Bernë ka njoftuar shtetasit e Kosovës, të cilët jetojnë dhe qëndrojnë në Zvicër se me përjashtim të rasteve emergjente, shërbimet e rregullta konsullore në Konsullatën e Përgjithshme në Gjenevë, Konsullatën në Cyrih dhe në Ambasadën në Bernë për këtë vit kalendarik përfundojnë nga data 23 dhjetor 2024, transmeton albinfo.ch.

Sipas njoftimit, ofrimi i shërbimeve konsullore do të fillojë nga data 3 janar 2025, pas përfundimit të festave zyrtare në Republikën e Kosovës.

“Ambasada dhe Konsullatat i bëjnë thirrje shtetasve të Republikës së Kosovës të cilët mund të kenë nevojë për çfarëdo shërbime, sidomos për pajisje të certifikatave me fotografi për fëmijë e fletudhëtime që t’i marrin ato para kësaj date. Për shërbimet e fundit konsullore nuk ka nevojë që të bëhet termin paraprak, por, mjafton paraqitja para Ambasadës ose Konsullatës me dokumentet që kërkohen dhe brenda orarit të punës”, thuhet në njoftim.