Ambasada në Zagreb nis dhënien e vizave kosovare

Ambasada e Republikës së Kosovës në Zagreb fillon lëshimin e vizave për shtetasit e Bosnjës dhe Hercegovinës

Ambasada e Republikës së Kosovës në Zagreb që nga data 3 shtator 2014 ka filluar me shërbimin e vizave për shtetasit e huaj që nuk e kanë njohur Kosovën. Sipas një njoftimi lëshuar nga Ministria e Punëve të Jashtme, sot në ambientet e Ambasadës i është lëshuar viza e parë një shtetasi boshnjak.

“Numri i kërkesave për pajisje me vizë është i lartë, kryesisht nga shtetasit boshnjak vend me të cilin Republika e Kosovës aplikon regjimin e vizave”, thuhet në një njoftim lëshuar nga zëvendëskonsulli Arben Muhameti.

Qeveria e Republikës së Kosovës me vendimin nr.02/74 të datës 16.05.2012 ka filluar aplikimin e regjimit të vizave për një numër të madh shtetesh. Si Autoritetet kroate dhe Ambasada e Bosnje Hercegovinës në Zagreb janë njoftuar për fillimin e shërbimit me viza.

Ndryshe, Qeveria e Kosovës më 22 janar ka marrë vendim që të vendosë regjim vizash për qytetarët e Bosnjës dhe Hercegovinës. Ky vendim vjen pas një ultimatumi që Prishtina zyrtare i ka dhënë Sarajevës, që kjo e fundit ta heq regjimin e vizave për qytetarët e Kosovës.

Pasi që Bosnja dhe Hercegovina nuk kanë pranuar që kosovarët të kalojnë lirshëm nëpër shtetin e tyre, pason vendimi i Qeverisë së Kosovës që të aplikojë viza për qytetarët e Bosnjës dhe Hercegovinës. Regjimi i vizave përjashtohen shtetasit e Bosnjës që kanë viza shumëhyrëse të Schengenit.