Ankesat e azilkërkuesve shqiptarë bllokojnë gjykatat gjermane!

Shqiptarët përmendin shkaqet ekonomike, korrupsionin, dhunën, përkujdesjen e dobet shëndetësore si arsye për të mbetur në Gjermani

Gjyqësia gjermane po vuan nga pesha e shtuar dukshëm e ankesave që po bëjnë azilkërkuesit kundër vendimeve për braktisje të Gjermanisë. Në shumicën e landeve federale ka një shtim të madh, së paku dyfishim të numrit të ankesave në krahasim me vitet e kaluara.

Ndërsa situata më dramatike paraqitet në Bavari, ku kemi një shtim të madh të ankesave, ose shtatë fish më shumë se mesatarja e ankesave nga viti 2004 deri në vitin 2013, ka thënë për agjencinë dpa Robert Seegmüller, kryesues i lidhjes së gjykatësve administrativë të Gjermanisë.

Numri enorm i ankesave nga sfera e azilit do të bëjë që gjykatat administrative në gjithë vendin të lënë pa përfunduar lëndët e tyre të zakonshme, ka thënë Seegmüller.

Në Gjykatën Administrative të Hamburgut për shembull është regjistruar një shtim i madh i ankesave të bëra nga shqiptarët e Shqipërisë dhe të Kosovës. Po ashtu edhe në Berlin mbizotërojnë ankesat nga shtetasit e Kosovës dhe të Shqipërisë.

Ajo që është karakteristike për këto ankesa, ka thënë Seegmüller është përmendja e shkaqeve ekonomike si arsye për të mbetur në Gjermani. Po ashtu edhe korrupsioni e dhuna si dhe përkujdesja e dobët shëndetësore numërohen nga shqiptarët si shkaktarët kryesorë për të kërkuar azil në Gjermani. Por, ka shtuar ai, gjasat për të fituar azilin mbi këto baza janë “afërsisht të barabarta me zero”.