Arrestohen 3 artistë zviceranë, po shëtisnin lakuriq nëpër Zagreb

Përveç tre zviceranëve, policia ka shoqëruar edhe një artist amerikano-korean i cili ishte shtrirë për të fjetur në një shesh të Zagrebit

Tre artistë zvicerane, dy meshkuj dhe një femër janë arrestuar ne Zagreb të Kroacisë pasi që po shëtisnin të lakuriquar nëpër qytet. Këtë shëtitje ata po e bënin në formë të performancës në kuadrin e një festivali të artit alternativ. Sipas televizionit kroat (HRT) ata fillimisht janë bindur nga policia që të visheshin dhe pastaj janë shoqëruar në stacionin e afërm të policisë.

Ndërkaq, organizatorët e festivalit kanë bërë të ditur se ata kanë qenë të njoftuar paraprakisht rreth aksionit të përmendur të artistëve.

Përveç tre zviceranëve, policia ka shoqëruar edhe një artist amerikano-korean i cili ishte shtrirë për të fjetur në një shesh të Zagrebit.

Festivali i artit alternativ me moton “Unë e dua Zagrebin” i është kushtuar artistit konceptual kroat Tomislav Gotovac. Ai merret me temën e lidhjeve në mes të trupit dhe hapësirës publike. Gotovac qe bërë  njohur me faktin se në vitin 1981 kishte shëtitur plotësisht lakuriq rrugëve të Zagrebit.