Arrestohen dy persona që vendosën flamurin shqiptar në kalanë e Ohrit

Foto ilustrim

Mediat në Maqedoni kanë raportuar se janë arrestuar dy persona nga një grup i këngëve dhe valleve folklorike, të cilët kishin vendosur flamurin kuq e zi në kalanë e Samuilit në Ohër.

Ndaj këtij rasti ka reaguar Aleanca për Shqiptarët, sipas të cilëve flamuri ishte vendosur për shkak të koreografisë, e jo për ndonjë qëllim provokues, shkruan albinfo.ch.

Ata po ashtu janë shprehur të shqetësuar lidhur me rastin dhe kanë thënë se kur vjen puna te simbolet shqiptare, vazhdon mentaliteti diskriminues.

“Ngritja e flamurit kombëtar shqiptar, sipas informacioneve që kemi, aspak nuk ka pasur për qëllim provokimin e dikujt, por është vendosur për koreografi të grupit të valltarëve nga shoqata kulturore arbëreshe. Vendosja e flamurit kombëtar shqiptar në Kalanë e Ohrit nuk paraqet as shkelje ligjore e as rrezik për askënd, aq më pak kur dihet se në Maqedoninë e Veriut shqiptarët përbëjnë 1/3 e popullatës dhe janë popull autokton”, thuhet në reagimin e tyre, përcjell albinfo.ch.

Sipas ASH-së, ky incident e dëmton imazhin edhe të shtetit të Maqedonisë së Veriut.