Arrestohet i dyshuari për vrasjen e Zymberit

Ky person është njëri nga gjashtë personat për të cilët janë lëshuar urdhër-arrestet ndërkombëtare në tetor 2011

Hetuesit e Task Forcës së EULEX-it në Mitrovicë, e kanë arrestuar njërin nga të dyshuarit e kërkuar lidhur me vrasjen e policit të Policisë së Kosovës, Enver Zymberi.

Sipas një njoftimi lëshuar nga EULEX-i, arrestimi ka ndodhur të enjten në mëngjes në Mitrovicë.

Ky person është njëri nga gjashtë personat për të cilët janë lëshuar urdhër-arrestet ndërkombëtare në tetor 2011.

Polici i njësisë speciale ROSU, Enver Zymberi, është qëlluar nga ekstremistët serbë më 25 korrik të vitit të kaluar, në kohën kur Policia speciale e Kosovës me urdhër të kryeministri Hashim Thaçi hyri në pjesën veriore të banuar me serbë.

Për vrasjen e policit kosovar, EULEX-i ka zhvilluar hetime, ndërsa ka lëshuar fletarrest për gjashtë persona: Slobodan Vuqiniq, Ratomir Bozhoviq, Radovan Radiq, Milovan Vlashkoviq, Dushan Jovanoviq dhe Radomir Kasaloviq.

Derisa hetuesia e EULEX-i nuk tregon me emra se cili është arrestuar, burimet e Albinfo.ch nga Mitrovica tregojnë se nën pranga është vënë Slobodan Vuqiniq. Më 26 janar të këtë viti EULEX-i gabimisht në fshatin Çabër kishe arrestuar vëllanë e tij, Radisha Vuçniq, por e kishte liruar menjëherë pas masës ndaluese.