Arrestohet ministri në Kosovë

Pas përfundimit të intervistimeve, me vendim të prokurorit, Damka dhe i dyshuari tjetër janë ndaluar për 48 orë

Ministri në largim i Zhvillimit Rajonal në Kosovë, Fikrim Damka, është arrestuar të dielën në Prizren, së bashku me një familjar të tij me inicialet F.D.

Ata dyshohen për veprat penale “sulm” dhe “kanosje”.

Lajmi është konfirmuar nga Policia e Prizrenit, e cila ka njoftuar se rasti është raportuar rreth orës 18:00 më 9 shkurt, raportojnë mediat në Kosovë, transmeton albinfo.ch.

Zëdhënësi i Policisë, Shaqir Bytyqi, ka bërë të ditur për Dukagjinin se autoritetet kanë intervistuar të dyshuarit dhe viktimat, duke mbledhur prova dhe dëshmi shtesë lidhur me ngjarjen.

“Dje me datë 09.02.2025 rreth orës 18:00 në Prizren është raportuar një rast ‘Kanosje dhe Sulm’ , Policia ka intervistuar të dyshuarit F.D. dhe viktimat si dhe janë mbledhur  prova dhe dëshmi tjera”, ka thënë Bytyqi.

Pas përfundimit të intervistimeve, me vendim të prokurorit, Damka dhe i dyshuari tjetër janë ndaluar për 48 orë.

Ndryshe, Partia Turke e Lëvizjes Novatore (YTHP) publikisht ka akuzuar kryetarin e Partisë Demokratike Turke të Kosovës, (KDTP), Fikrim Damka, për sulm fizik ndaj një kandidateje për deputete nga radhët e YTHP-së.

---