Asdren Sopi, Dj. i famshëm në Zvicër

Dj. Dreni për çdo vikend është i angazhuar për të argëtuar publikun zviceran dhe të huaj në Zvicër, duke bërë muzikë hip-hop R&b.

Më këtë “zanat” ai merret që prej moshës 13-vjeçare. “Në fillim kam bërë muzikë vetëm për shoqërinë time. Pastaj filluan të më vijnë ofertat dhe tani jam çdo vikend i angazhuar në mbrëmje të ndryshme”, thotë Asdreni për gazetën “albinfo.ch”.

Si pjesë e labelit muzikor në Zvicër,  Madness, Asdreni bën muzikë për yje të muzikës si: Fatman Scoop nga Nju-Jorku, Kay One, Bushido, Shindy e shumë këngëtarë të tjerë të njohur gjermanë, por nuk mungojnë as bashkëpunimet me shqiptarët.

“Unë jam i ftuar çdo vikend të këndoj në diskoteka zvicerane. Kam bërë muzikë për këngëtarë të njohur gjermanë, por edhe për shqiptarë. Para dy muajve ka qenë i ftuar Ardian Bujupi në një diskotekë zvicerane “Fabric club” në Zug, pastaj me Kay One, ndërsa unë isha Dj., kurse këtë të premte do të jem në diskotekën “Avalon Club” në Luzern, ku do të bëjmë muzikë bashkë me reperin Shindy nga Gjermania”, thotë ai.

Ndonëse vendet ku bën muzikë Dj. Dreni kryesisht janë me publik zviceran dhe të huaj, ai gjatë mbrëmjeve të tij nuk lë pa lëshuar edhe ndonjë këngë shqip. “Lëshoj këngët e shumë këngëtarëve shqiptarë, por ato që pëlqehen më së shumti janë këngët e Mc. Kresha, “Shqip Dance” nga Etno Engjujt dhe “Tavolina” nga Ledri, Ermali, Ledri dhe Lumi B.”, shprehet Dreni, duke shtuar se Dj. më të preferuar të tij janë Dj. Mustard dhe Dj. Antonio, anipse ky i fundit bën një tjetër zhanër muzikor.

Këngët shqip, pjesë e albumit të tij

Asdreni është i lindur në Baar, kanton Zug, ndërsa me prejardhje është nga Gjilani. Ai thotë se sa herë që vjen në Kosovë, mban edhe mbrëmje muzikore. “Deri më tash kam bërë muzikë në diskotekën “Stop” në Gjilan si dhe nëpër disa kafene, ndërsa gjatë verës që vjen kam disa oferta për të bërë muzikë nëpër klube të njohura të Kosovës”, shprehet ai për albinfo.ch

Në planet e Dj. Drenit është të realizojë edhe albumin e tij të parë, por është duke menduar që pjesë e albumit të këtë ndonjë këngë shqipe. “Jam duke menduar për këtë. Edhe prindërit e mi po kanë dëshirë. I kam disa plane, por është herët për të zbuluar më shumë rreth kësaj”, na tregon ai.