Asfaltimi i rrugës drejt Voskopojës, rrit turizmin kulturor në këtë zonë

Aksi rrugor Voskop-Voskopojë, një prej segmenteve me fluksin më të lartë të levizjes së automjeteve me destinacion zonën turistike të Voskopojës dhe me aktivitet të lartë në bujqësi dhe blegtori, është në përfundim të rikonstruktimit.

Riparimi i shtresave të dëmtuara të asfaltit në këtë aks ka përmirësuar infrastrukturën rrugore, duke ofruar më shumë siguri dhe duke shkurtuar kohën drejt destinacioneve turistike në këtë zonë.

Investimi në këtë aks shton një tjetër vepër të re me standarde bashkëkohore në rrjetin e  infrastrukturës së vendit, e cila po transformohet nga dita në ditë jo vetëm në akset kombëtare, por për herë të parë edhe në ato dytësore rurale.

Rruga Korçë – Voskop – Voskopojë, një investim i qeverisë shqiptare nëpërmjet Fondit Shqiptar të Zhvillimit, lehtëson aksesin në shërbime për 6 mijë banorë të zonës dhe ndihmon fermerët të arrijnë tregun e Korçës më shpejt dhe me kosto më të ulët.

Ndërkohë që lidhja edhe me rrugën që çon drejt Voskopojës krijon mundësi të reja edhe për zhvillimit e agroturizmit dhe turizmit kulturor, shkruan ATSH, përcjell Albinfo.ch.