Atentatorët e Brukselit nuk kanë lidhje me Zvicrën

Është spekuluar se atentatorët që shkaktuan sulmet terroriste në Bruksel, mund të kenë ndonjë lidhje me Zvicrën. Por, siç ka theksuar drejtori i Shërbimit Informativ të Zvicrës Markus Seiler, kjo gjë nuk është e vërtetë.

Seiler në një intervistë dhënë gazetës zvicerane në gjuhën frënge “Le Temps” ka thënë se nevojitet më shumë shkëmbim informacionesh në mes të shërbimeve të shteteve të ndryshme lidhur me rreziqet nga terrorizmi. “Mes tjerash `Task Force Tetra` (Terrorist Travellers) e cila është aktivizuar pas sulmeve në Bruksel duhet të sigurojë një koordinim më të mirë në këtë drejtim.

Kjo do t`u mundësonte autoriteteve të veprojnë më shpejt dhe më me efikasitet.

Seiler më tutje ka thënë se në dokumentet interne të organizatës terroriste IS, të cilat janë përfolur nga mediet e huaja, shërbimi informativ i Zvicrës ka gjetur vetëm gjashtë persona që kanë ndonjë lidhje me Zvicrën.