Austri: Arrihet koalicioni i ri qeveritar, pa partinë populiste të djathtë

Partia populiste e djathtë FPÖ me liderin e saj Herbert Kickl kishte fituar më së shumti vota në zgjedhjet e mbajtura në shtator 2024

Në Austri, ÖVP konservatore, SPÖ socialdemokrate dhe Neos liberale duan të formojnë qeverinë e re. Për këtë, të shtunën pasdite, të tri partitë e kanë njoftuar presidentin federal, siç raporton ORF.

Presidenti Federal tha të shtunën pas një takimi me liderët e partive në Hofburg të Vjenës se ai kishte ndjenjën se diçka kishte përparuar vërtet dhe se negociatat për koalicionin ishin në rrugën e duhur, transmeton albinfo.at. Të tri palët janë më të gatshme për kompromis.

Koalicioni i ÖVP, SPÖ dhe Neos është aleanca e parë e tri partive në nivel federal, në Austri.

Pas zgjedhjeve parlamentare në shtator, bisedimet e para të koalicionit midis ÖVP dhe SPÖ dhe me Neos dështuan në janar, raportojnë mediat austriale. Kjo u pasua nga negociatat mes FPÖ-së së djathtë dhe ÖVP-së, por edhe këto u rrëzuan.

Partia populiste e djathtë FPÖ me liderin e saj Herbert Kickl fitoi më shumë vota në zgjedhje me pothuajse 29 për qind, përpara ÖVP me 26.3 për qind dhe SPÖ me 21 për qind.

Liberalët e partisë Neos përbënin 9.1 për qind dhe të Gjelbrit 8.2 për qind. ÖVP dhe SPÖ do të kishin një shumicë prej vetëm me një votë në Këshillin Kombëtar. Ndërsa tani, së bashku me Neos-in, ata do të kenë 110 nga 183 vende parlamentare.

---