Austri: Ekspertët paralajmërojnë për valët e gripit dhe Covid

Austria ka regjistruar tashmë rastet e para të gripit në fillim të tetorit – rreth një deri në dy muaj më herët se zakonisht, raportoi gazeta Die Presse, përcjell albinfo.ch.

Ministri i Shëndetësisë, Johannes Rauch (Të Gjelbrit), ka rekomanduar që njerëzit të vaksinohen sa më shpejt të jetë e mundur. Në Vjenë regjistrimi për fushatat e vaksinimit falas të gripit nis këtë të hënë, më 24 tetor.

Çdo vit, mesatarisht 1000 deri në 1500 njerëz vdesin në Austri nga virusi i gripit. Megjithatë, nuk ishte kështu në dy vjetët e fundit, pasi vala e gripit nuk ndodhi në të njëjtën mënyrë për shkak të masave Covid për të reduktuar kontaktet.

“Prandaj, imuniteti në popullatë është relativisht i ulët dhe rreziku i një vale të fortë gripi është veçanërisht i lartë”, tha Drejtoresha e Përgjithshme e Shëndetit Publik, Katharina Reich. Imuniteti i ulët në popullatë mund të jetë edhe shkak për shfaqjen e hershme të rasteve të para. Ajo këshillon njerëzit që të vaksinohen, të mbajnë një maskë FFP2 dhe të mbajnë masat higjienike.

Monika Redlberger-Fritz nga Qendra për Virologji në Universitetin Mjekësor të Vjenës gjithashtu këshillon fuqishëm vaksinimin dhe paralajmëron se spitalet mund të arrijnë kufijtë e kapacitetit të tyre nëse dhe kur valët e gripit dhe Covid-19 përkojnë.