Austri, shërohet personi i lënduar nga shpërthimi i bombolës në Ferizaj

Para pak muajsh në qytetin e Ferizajit shpërtheu një bombolë gazi, ku mbetën disa të lënduar. Dy personat që kishin lëndime më të theksuara nga shpërthimi u nisën për shërim në Austri, transmeton albinfo.ch.

Shteti austriak ishte i hapur dhe pranoi të dy pacientët që kishin djegie të shkallës më të lartë.

Lajmi i mirë është se njëri është shëruar pothuajse plotësisht dhe është liruar nga spitali austriak, shkruan albinfo.ch.

Sot, ambasadori shqiptar në Austri, Lulzim Pllana, ka vizituar dy qytetarët kosovarë në Spitalin e Gracit, ku kanë qëndruar për shërim nga eksplozioni i ndodhur në Ferizaj.

Falë kujdesit të madh dhe intensiv nga mjekët austriakë, sot u lirua nga spitali njëri nga ta zt. Fidan Gashi, të cilin e përcollëm për Kosovë. Qytetari tjetër pritet të shërohet së shpejti dhe t’i bashkohet familjes.

Ambasada e Kosovës në Austri ka falënderuar përzemërsisht autoritetet austriake për koordinimin e palodhshëm të Ministrisë Federale të Austrisë për çështje Evropiane dhe Ndërkombëtare dhe Ministrisë Federale të Mbrojtjes, transmeton tutje albinfo.ch.

“Për mbështetjen, kujdesin dhe komunikimin e vazhdueshëm, falënderojmë përzemërisht Spitalin e Gracit, mjekët  Prof. Dr. Lars-Peter Kamolz dhe stafin e tij, Dr. Signe Buck dhe bashkatdhetaren tonë për përkthimin, znj. Lindita Maxhuni, të cilët kanë asistuar qytetarët tanë në çdo aspekt që nga pranimi i tyre”. /Albinfo.ch