Babai i autorit të sulmit në Winterthur: Djali im është i sëmurë psikikisht, jo terrorist

31-vjeçari që sulmoi me thikë tre persona në stacionin e trenit kishte probleme të rënda psikike, thotë familja

Detaje të reja kanë dalë në dritë lidhur me sulmin me thikë që ndodhi të enjten në stacionin e trenit në Winterthur të Zvicrës, ku 31-vjeçari Nesip Dedeler plagosi tre persona gjatë orëve të mëngjesit, përcjell albinfo.ch.

Gjatë sulmit, autori thuhet se ka bërtitur “Allahu akbar”, ndërsa autoritetet zvicerane e kanë cilësuar rastin si një akt me motive terroriste. Megjithatë, babai i tij ka kundërshtuar ashpër këtë përshkrim, duke deklaruar se djali i tij vuan nga probleme të rënda psikike dhe ka nevojë për trajtim.

“Djali im nuk është terrorist, por i sëmurë psikikisht dhe ka nevojë për ndihmë”, ka deklaruar babai i tij, Ayhan Dedeler, për mediat zvicerane.

Sipas policisë, nga sulmi mbetën të plagosur tre burra të moshave 28, 43 dhe 52 vjeç. Njëri prej tyre ndodhet në gjendje të rëndë, ndërsa dy të tjerët kanë pësuar lëndime mesatare. Sulmuesi u arrestua menjëherë në vendin e ngjarjes.

Babai i autorit ka pranuar se djali i tij kishte frekuentuar më herët xhaminë e njohur An’Nur në Winterthur, e cila vite më parë ishte lidhur me raste radikalizimi të disa të rinjve. Megjithatë, ai insistoi se problemet kryesore të djalit të tij lidhen me gjendjen mendore dhe izolimin social.

Ai përshkroi një jetë të vështirë për 31-vjeçarin, duke thënë se prej vitesh nuk kishte punë, trajnim profesional apo jetë sociale dhe se jetonte i izoluar në banesën e nënës së tij.

“Prej vitesh ai nuk bënte asgjë, pinte tri apo katër paketa cigare në ditë dhe kishte sjellje të çrregullta. Ne si familje jemi përpjekur vazhdimisht që ai të merrte ndihmë psikologjike”, ka thënë babai i tij.

Sipas familjes, gjendja e tij ishte përkeqësuar ndjeshëm në dhjetë ditët e fundit. Ai kishte qëndruar edhe në një klinikë psikiatrike, por ishte larguar vetëm dy ditë para sulmit.

Autoritetet zvicerane vazhdojnë hetimet për motivin e sulmit, ndërsa rasti ka shkaktuar debat të madh publik në Zvicër për çështjet e sigurisë, radikalizimit dhe shëndetit mendor. /Albinfo.ch

---