Banka Botërore: Jetëgjatësia mesatare në Kosovë është 80 vjet

(KEYSTONE/Gaetan Bally)

Të dhënat nga Banka Botërore kanë treguar se jetëgjatësia mesatare e pritur në Kosovë është 80 vite apo 4-5 vite më e lartë sesa mesatarja e shteteve tjera të Ballkanit Perëndimor.

Ministri i Financave, Punës dhe Transfereve në Kosovë, Hekuran Murati, në lidhje me këtë ka shkruar se ky është tregues mjaft i mirë edhe për cilësinë e jetës në vend, transmeton albinfo.ch.

“Jetëgjatësia e pritur është tregues mjaft i mirë edhe për cilësinë e jetës në një vend. Sipas të dhënave të grumbulluara nga Banka Botërore, jetëgjatësia mesatare e pritur në Kosovë është 80 vite apo rreth 4-5 vite më e lartë sesa mesatarja e shteteve tjera të Ballkanit Perëndimor”, ka shkruar ai.

Ndryshe, sipas këtyre të dhënave, jetëgjatësia mesatare e pritur në Shqipëri është 77 vite, në Mal të Zi 76 vite, në Serbi dhe në Bosnjë e Hercegovinë nga 75 vite, dhe në Maqedoni të Veriut 74 vite.