Banorët e Shipitullës: Të shtunën do t’i ndalim ekskavatorët e KEK-ut

Banorët e fshatit Shipitull kanë protestuar para Qeverisë së Kosovës me kërkesën e vetme punësimin e rreth 150 të rinjve të fshatit që u shpërngulën nga pronat e tyre.

Banorët kanë thënë se kryeministri Ramush Haradinaj duhet ta mbajë premtimin e dhënë në shtatorin e vitit të kaluar, kur edhe i kishte bindur ata që të pranonin propozimin e qeverisë, përcjell albinfo.ch.

Albion Mjekiqi, një i ri nga ky fshat, thotë se ka diplomuar në ekonomi dhe kërkon nga Haradinaj që të mbajë premtimin. Ai ka thënë se kjo është protesta e fundit e banorëve dhe nëse ekzekutivi nuk bën asgjë, ata do t’i ndalojnë punimet për nxjerrjen e thëngjillit.

Ai ka shtuar se nëse nuk do të ketë punësime për ta, nuk do të ketë energji për askënd.

Ndërkaq, Nexhmedin Mjekiqi, përfaqësues i fshatit, thotë se në konkursin e fundit të KEK-ut janë punësuar njerëz nga Mitrovica, Deçani dhe Drenica, ndërsa kuadrot e Shipitullës janë lënë jashtë.

Protestuesit kanë kërkuar që të takohen me kryeministrin Haradinaj, i cili nuk ka gjetur kohë për ta.

Pasi kanë pritur rreth dy orë, ata janë kthyer mbrapsht të indinjuar nga refuzimi i kryeministrit dhe kanë paralajmëruar se të shtunën do t’i ndalin punimet në nxjerrjen e thëngjillit.