Bazeli do të mbajë një referendum kundër zbritjes direkte të taksës mbi pagat

(KEYSTONE/Christian Beutler)

Në tetor, shumica e deputetëve në parlamentin e Qytetit të Bazelit ranë dakord të futnin një taksë të mbajtur në burim, e cila zbritet direkt nga pagat dhe u paguhet autoriteteve tatimore, shkruan The Local, transmeton albinfo.ch.

Ky sistem është i ndryshëm nga ai i zakonshëm – zakonisht, të gjithë punonjësit në Zvicër paguajnë taksat e tyre me një të rënë në mars të çdo viti, dhe vetëm tarifat e sigurimeve shoqërore zbriten nga pagat çdo muaj.

Megjithatë, shoqata e punëdhënësve të Bazelit, si dhe Dhoma e Tregtisë, kanë frikë se sistemi i ri do të krijojë një barrë burokratike për bizneset dhe për këtë arsye kishin nisur një peticion kundër këtij ndryshimi; pasi mblodhën numrin e mjaftueshëm të nënshkrimeve, kjo çështje do të sillet në kutinë e votimit në nëntor 2026.