BB: Kosova pëson rënie të bruto-prodhimit

Pritet rënie e bruto-prodhimit vendor në 3.9 për qind në 2012-ën dhe 3.6 për qind në 2013-ën nga 6.3 për qind sa ishte në vitin paraprak

Vendet në zhvillim duhet të përgatiten për rreziqe të reja, në kohën kur problemet e borxhit në Eurozonë dhe rritjet e dobëta në disa ekonomi në zhvillim po zbehin perspektivat e rritjes globale, thuhet në raportin e ri të Bankës Botërore “Perspektivat Globale Ekonomike për Vitin 2012”.

Banka ka ulur parashikimin e saj të rritjes për vitin 2012 në 5.4 për qind për vendet në zhvillim dhe në 1.4 për qind për vendet me të ardhura të mëdha, nga parashikimet e qershorit të kaluar që ishin 6.2 për qind, respektivisht 2.7 për qind.

Në kuadër të parashikimeve të reja është përfshirë edhe Kosova. Sipas raportit, ato flasin për rënie të bruto-prodhimit vendor në 3.9 për qind në 2012-ën dhe 3.6 për qind në 2013-ën nga 6.3 për qind sa ishte në vitin paraprak.

Rritja e ngadalshme tashmë vihet re në tregun e dobësuar global, ashtu si edhe në çmimet e mallrave, thuhet në raport.

Eksportet globale të mallrave dhe shërbimeve janë zgjeruar në 6.6 për qind gjatë 2011-ës, çfarë paraqet rënie të dukshme nga 2010-ta, kur ishin 12.4 për qind. Gjatë këtij viti ato pritet të rriten vetëm në 4.7 për qind.

Sipas raportit të Bankës Botërore, çmimet globale të energjisë, metaleve dhe mineraleve, si dhe të produkteve bujqësore kanë rënë për 10, 25 dhe 19 për qind që nga fillimi i 2011-ës. /rel/