Bashkimi Evropian planifikon të rrisë numrin e pjesëtarëve të Agjencisë Evropiane të Rojës Kufitare dhe Bregdetare (Frontex) deri në 30 mijë dhe t’i zgjerojë kompetencat e saj në procesin e kthimit të migrantëve.
Propozimi i paraqitur nga Komisioni Evropian synon që, gjatë 15 viteve të ardhshme, agjencia të ketë më shumë personel dhe të reagojë më shpejt në rastet e krizave kufitare. Nga numri i parashikuar, 17 mijë pjesëtarë do të jenë pjesë e një rezerve në dispozicion të shteteve anëtare.
Reforma parashikon gjithashtu përfshirjen më të madhe të Frontex-it në kthimin e migrantëve që nuk kanë të drejtë qëndrimi në BE, përfshirë mundësinë e angazhimit në qendra kthimi jashtë territorit të Bashkimit Evropian.
Sipas raportimeve, një qendër e tillë pritet të hapet në Ruandë, ku mund të dërgohen azilkërkuesve kërkesat e të cilëve janë refuzuar në disa shtete evropiane.
Presidentja e Komisionit Evropian, Ursula von der Leyen, tha se forcimi i Frontex-it është i nevojshëm që Evropa të ketë më shumë kontroll mbi hyrjen në territorin e saj.
Propozimi duhet të miratohet nga shtetet anëtare dhe Parlamenti Evropian. Ndërkohë, ai është kritikuar nga përfaqësues të së majtës dhe organizata joqeveritare, të cilat kundërshtojnë ashpërsimin e politikave të migracionit dhe kanë ngritur shqetësime për trajtimin e migrantëve.
