Sipas policisë bavareze, një 26-vjeçar në Gjermani humbi disa qindra euro pasi transferoi para në përgjigje të një kërkese që dukej se vinte nga një person i njohur. Mashtrimi u zbulua vetëm pasi viktima mori një kërkesë të dytë dhe e kontaktoi drejtpërdrejt personin, i cili mohoi se kishte kërkuar para.
Metoda “Ghost Pairing” shfrytëzon funksionin e WhatsApp-it për lidhjen e pajisjeve. Mashtruesit i bindin përdoruesit të autorizojnë pajisje të panjohura, duke fituar mundësinë të përdorin llogaritë e tyre për të dërguar mesazhe dhe për të kërkuar para nga kontaktet.
Për këtë skemë kanë paralajmëruar edhe autoritetet në Zvicër.
Për t’u mbrojtur nga mashtrimi, përdoruesit këshillohen:
– Të kontrollojnë rregullisht pajisjet e lidhura me llogarinë e tyre dhe të shkëputin ato që nuk i njohin.
– Të mos ndajnë kodet e verifikimit me persona të tjerë.
– Të aktivizojnë verifikimin me dy hapa.
– T’i konfirmojnë përmes telefonatës kërkesat e pazakonta për para, edhe kur duket se vijnë nga persona të njohur.
Autoritetet theksojnë se kujdesi ndaj mesazheve të dyshimta dhe kontrollimi i pajisjeve të lidhura janë hapa të rëndësishëm për të parandaluar vjedhjen e llogarisë dhe humbjet financiare.
