BE-ja paralajmëron presidentin serb të Bosnjës, Milorad Dodik

Bashkimi Evropian ka dënuar vendimin e Republikës Serpska të Bosnjë e Hercegovinës dhe autoriteteve të saj për t’i dhënë presidentit rus, Vladimir Putin, ‘Urdhrin e Republikës Sërpska’.

Këtë qëndrim të BE-së e bëri publik në një konferencë për media zëdhënësi i BE-së, Peter Stano.

“Në Bashkimin Evropian nuk ka vend për nderimin dhe shpërblimin e politikanëve që urdhërojnë shkatërrimin e një vendi fqinj dhe vrasjen e popullit të tij. Kjo duhet të jetë e qartë për të gjithë dhe ky vendim i udhëheqjes së Republikës Sërpska është për keqardhje dhe i gabuar”, tha Stano.

Presidenti i entitetit të Bosnjë e Hercegovinës, Republikës Sërpska, Milorad Dodik, ndau çmimin më 8 janar për, siç u tha, “kujdesin patriotik dhe dashurinë [e Putinit] për Republikën Sërpska”.