BE: Shqipëria nuk rrezikon rikthimin e vizave

Shqipëria nuk rrezikon rikthimin e regjimit të vizave me vendet e hapësirës Shengen

Zyrtarë të Komisionit dhe Parlamentit Evropian konfirmuan se shifrat e azilkërkuesve shqiptarë kanë një ulje të ndjeshme këtë muaj, krahasuar me gushtin, shtatorin apo tetorin.

Madje Parlamenti Evropian ka vendosur që të ndryshojë propozimin e Komisionit Evropian në rregulloren për rivendosjen e vizave afatshkurtra për vendet me numër të lartë azilkërkuesish, e cila pritet të kalojë në dhjetor në mbledhjen e Këshillit të Ministrave, raportojnë mediet në Tiranë.

Komisioni Evropian kërkonte që vendet të cilat në gjashtë mujorin e fundit e kanë numrin e azilkërkuesve 50% më të lartë se gjashtë mujorin e parë t’u rikthehen vizat, por për eurodeputetët, ky do të ishte një penalizim politik, prandaj do të propozojë që të mos flitet më për përqindje azilkërkuesish, por masa të forta mbrojtjeje.

Pasi në këtë mënyrë, penalizimi i Bosnjës dhe Shqipërisë, do të ishte i pandershëm, pasi në tërësi ato e kanë respektuar më fort këtë proces, po të kujtojmë që ishin vendet që e përfituan para nesh lëvizjen e lirë, Serbia Mali i Zi apo Maqedonia, ato që alarmuan vendet e Unionit.

Sidoqoftë, edhe me rregulloren e re, zyrtarët e BE-së konfirmojnë se Shqipëria nuk është problematike dhe nuk rrezikon të penalizohet, citon “ABC News”.

Pati një numër në rritje azilkërkuesish në Belgjikë dhe me ndërhyrjen e qeverisë belge dhe asaj shqiptare nga ndëshkimi i tyre deri tek sensibilizimi me spote publicitare, ka ndikuar në ndërgjegjësimin e qytetarëve, duke ulur në muajin nëntor ndjeshëm numrin e azilkërkuesve sikundër ne pjesën më të madhe të vitit ka qenë.