Berset: Zvicra tashmë ka hyrë në Valën e Dytë të pandemisë

"Vala e dytë është këtu", thotë Berset. Dhe ajo po vjen më herët si dhe më e fortë se sa pritej

Ministri i Shëndetësisë Alain Berset në konferencën për media ka shpjeguar pse janë të nevojshme masat e ndërmarra sot. Ai thotë se numri i infeksioneve është dyfishuar brenda një jave. Shtrimet në spital gjithashtu kanë filluar të rriten.

“Vala e dytë është këtu”, thotë Berset. Dhe ajo po vjen më herët si dhe më e fortë se sa pritej, transmeton albinfo.ch. Por ne dimë si të reagojmë. Mbajtja e distancës, maskat, higjiena janë masat më të rëndësishme dhe tani ato duhet të respektohen me përpikëri.

Masat e reja nuk janë të krahasueshme me ndërhyrjen e Këshillit Federal në mars, ka theksuar ministri, duke iu referuar masës së gjendjes së jashtëzakonshme që ishte marrë në fillim të pandemisë, në mars 2020. Gjithçka do të vendoset së bashku me kantonet. Dhe kantonet mund të vendosin për masat e mëtejshme.

Por ajo që duhet të theksohet është se Këshilli Federal nuk dëshiron të mbysë jetën ekonomike në  vend. “Duhet të jetë akoma e mundur jeta dhe puna normale, me vetëm disa kufizime.”

Shifrat janë shpërthyese. Ekspertët presin rreth 12,000 raste të reja të koronavirusit në ditë, qysh brenda dy javëve të ardhshme! Zvicra tashmë është nën kthetrat e valës së dytë.

---